Ілюстрацыйнае фота
31 сакавіка ў Гродзенскай вобласці здарыліся тры пажары, на якіх загінулі двое чалавек, паведамляе МНС.
Каля 17.43 гадзін выратавальнікам паступіла паведамленне пра ўзгаранне сухой расліннасці каля вёскі Вараноўка Воранаўскага раёна, дзе знайшлі мёртвым мужчыну 1966 года нараджэння. Сухая расліннасць выгарала там на плошчы 0,03 гектара.
Вечарам гэтага дня ў вёсцы Пятроўцы Бераставіцкага раёна гарэў жылы дом, у якім загінуў мужчына 1961 года нараджэння. Агнём знішчаны дах, пашкоджаны сцены, перакрыцці і маёмасць у доме.
Раніцай 31 сакавіка ў Смаргоні на вуліцы Леніна гарэў легкавік Volkswagen Golf 2000 года выпуску. У выніку пашкоджаны маторны адсек, фары і элементы кузава машыны.
Прычыны пажараў і гібелі людзей высвятляюцца.