У Слоніме адбыўся першы выпуск “Школы юных пажарных”

Інспектары прапаганды падрыхтавалі для малечы розныя інтэрактыўныя лакацыі. Пры іх праходжанні дзеці акуналіся ў прафесію выратавальнікаў-пажарных і паралельна навучаліся правілам бяспечных паводзін.

У пачатку інспектар МНС пазнаёміў дзяцей з гісторыяй стварэння і развіцця пажарнай справы на Слонімшчыне, паказаў старадаўняе пажарнае дэпо райаддзела МНС і добраахвотнага пажарнага таварыства ды распавёў, як нашы продкі змагаліся з вогненнай стыхіяй.

Госці пабывалі таксама ў цэнтры аператыўнага кіравання, куды людзі тэлефануюць па нумарах 101 і 112, калі здараецца пажар ці іншая бяда і патрабуецца дапамога выратавальнікаў.

Хлопчыкі і дзяўчынкі даведаліся тут, як праходзяць дзяжурныя суткі ў выратавальнікаў і пазнаёміліся з пажарным абсталяваннем і спецтэхнікай.

Падчас “Экапіровачнай лакацыі” жадаючыя маглі прымерыць баявое адзенне выратавальнікаў, а на этапе “Бяспечная лакацыя” інспектары праверылі веды школьнікаў па правілах бяспекі і напомнілі, як не трапіць у бяду пры наведванні лясоў, вадаёмаў і падчас прагулкі па вуліцы.

На “Воднай лакацыі” супрацоўнікі МНС распавялі, у якіх месцах у Слонімскім раёне дазволена купацца. Тут кожны жадаючы паспрабаваў прымерыць выратавальныя сродкі на вадзе. Выратавальнікі нагадалі дзецям, што хадзіць на вадаём без дарослых строга забаронена.

Пасля завяршэння інтэрактыўнага навучання інспектары ўручылі дзецям сертыфікат пра паспяховае заканчэнне “Школы юных пажарных” і інфармацыйныя буклеты з карыснымі парадамі па бяспецы.

На завяршэнне мерапрыемства зрабілі агульны здымак на памяць пра гэтую сустрэчу.

Фота МНС