Ідуць слонімскія выпускнікі 2022 года
На паэтычнай хвалі
Яны сыходзяць у сваё жыццё,
У белы свет, у свет недасканалы,
Тваё дзяўчо, дачушка, птушанё
І хлопец твой спагадлівы, рахманы.
Іх школы выпускаюць, як з гнязда,
І школьнай інкубатарскай запраўкі
Замала для жыццёвага дабра,
Калі не будзе больш апекі мамкі.
Далей надзея толькі на сябе,
На стрыжань свой, да мэты каб патрапіць.
Пакуль дарога ўгору іх ідзе —
Так важна мэту правільна пазначыць.
Яны павінны лепш пражыць, чым мы
Для свету, для сябе і для Радзімы,
Не збудаваць уласнае турмы
І не патрапіць ў нашы тут руіны.