За мінулыя суботу і нядзелю ў Гродзенскай вобласці інспектары выявілі 20 нецвярозых кіроўцаў, паведамляе ДАІ.
У суботу ў 16.20 у Гродне супрацоўнікі ДАІ спынілі легкавік “Пежо” і выявілі ў 33-гадовага мужчыны відавочныя прыкметы ап’янення. Па заключэнні медыкаў, утрыманне алкаголю ў яго арганізме перавысіла дапушчальнае значэнне ў 9,5 раза.
У пратаколе парушальнік ПДР патлумачыў, што напярэдадні адпачываў у адным з гарадскіх клубаў. А ў суботу вырашыў з’ездзіць на машыне ў краму па піва.
Цяпер п’янаму кіроўцу пагражае 200 базавых адзінак штрафу і пазбаўленне правоў кіравання на 5 гадоў.
Таксама за мінулы тыдзень у Гродзенскай вобласці ДАІ выявіла 646 фактаў перавышэння хуткасці, адзначаецца ў паведамленні.