"Мазда" патрапіла пад удары
Днямі 23-гадовы жыхар Ліды, падагрэты спіртнымі напоямі, прагульваўся па дварах райцэнтра, калі на яго шляху паўстаў легкавік “Мазда”. Хлопцу падалося, што машына перагарадзіла яму дарогу, і ён са злосці некалькі разоў ударыў нагой прыпаркаваны па ўсіх правілах легкавік, паведамляе УУС Гродзенскага аблвыканкама.
Паведамленне пра гэта злачынства паступіла ў Лідскі РАУС. Лідскія міліцыянеры ўстанавілі асобу нападніка на машыну.
Падчас гутаркі малады чалавек не змог патлумачыць супрацоўнікам міліцыі матывы свайго ўчынку, паколькі быў у стане алкагольнага ап’янення, адзначаецца ў паведамленні.
Супраць лідзяніна мясцовы райаддзел Следчага камітэта ўзбудзіў крымінальную справу па артыкуле “Хуліганства”.
Фота УУС