Пажары на Гродзеншчыне: гарэў падвал у шматпавярховіку ў Ашмянах, жылы дом у Шчучынскім раёне і гаспадарчая пабудова ў Ваўкавыскім раёне

27 чэрвеня ў 12.47 ашмянскім выратавальнікам паведамілі пра пажар у падвале пяціпавярховіка на вуліцы Янкоўскага ў Ашмянах. На месцы рботнікі МНС убачылі, што ў падвале аднаго з пад’ездаў гарэлі дзверы ў ячэйку.

Як пазней высветлілася, двое дзяцей 8-мі і 5-ці гадоў забаўляліся ў падвале з запалкамі, падпалілі паперу, кінулі яе ў кут, а самі ўцяклі на вуліцу. Дзверы ў падвал і ячэйку былі адамкнёныя. Праз некаторы час суседзі адчулі пах гарэлага і выклікалі выратавальнікаў.
Байцы МНС ліквідавалі пажар, прычынай якога сталі дзіцячыя забаўкі з агнём. Агонь паспеў пашкодзіць уваходныя дзверы.

У гэты ж дзень у 16.23 стала вядома пра пажар у прыватнай гаспадарчай пабудове ў вёсцы Мачуліна Ваўкавыскага раёна. Работнікі МНС ліквідавалі пажар, аднак выратаваць будынак не ўдалося — агонь яго цалкам знішчыў.

Што тут стала прычынай пажару, павінны высветліць спецыялісты.

Вечарам 27 чэрвеня жыхарка аграгарадка Бакшты Шчучынскага раёна паведаміла выратавальнікам, што гарыць яе дом. Пажарныя разлікі адразу накіраваліся па ўказаным адрасе.

Вяскоўка распавяла, што знаходзілася з дзецьмі на вуліцы і ўбачыла, што з акна дома ідзе дым, і паведаміла пра гэта ў МНС.

Пажар ліквідавалі. Агнём пашкоджана маёмасць, закурадымлены сцены і столь у пакоі.

Прычына пажару высвятляецца.

Фота МНС